کوردستانا مەزن، دەولەتا کوردستانێ… ئەو ناڤن ێن کو ئەم کورد د خەونێن شەڤان دا هزر لێ دکەین، ب گوه لێ بوونا بەبەتەکێ ب ڤی ناڤی گوهێن مە خوەشتر وەردگرن، ناڤێ دەولەتا کوردستانێ لسەر تاقەکێ ژی ببینن سرنج و بالا مروڤی بو خوە رادکێشت، چونکە ئەگەر هات و ئەڤ چەندە راست بیت دا مروڤ بو جارەکێ ژی بیت بێژیت ئەز خەلکێ دەولەتا کوردستانێ مە و کوردستان وەلاتێ مەیە، و مروڤ خوە ژ عەرەب و فورس و تورکان جودا ببینت.
ئەز دزانم کو د ژیانێ دا چ تشتەک نینە کو چێ نەبیت، و گەلەک جاران مروڤ هەر هزر د هندەک تشتان دا ناکەتن لێ ب شێوەکی نەچاڤەرێکری تێنە گورێ بو نموونە ژ ناڤچوونا رژێما ژناڤچوویا سەدام حوسەینی. ب دیتنا من بو دەولەت بوونا کوردستانێ ژی بڤی رەنگی، لێ دەما مروڤ هزر دکەتن ئایا یا ب ساناهییە؟ یان نە؟ ئەڤە پرسیارەکە کو پێدڤی یە ئەم هەمی ژ خوە بکەین. ئەگەر یا ب ساناهی یە ئەم سەر چ بنەما ساناهی بونا وێ بینین؟ ئەگەر زەحمەت بیت ئەگەر چێ یە؟
ئەگەر ئەم بەرپەرێن مێژوویی بو پاشڤە بزڤرینین دێ خوینین کو گەلەک دەلیڤە بو کوردان هاتینە روخساندن لێ دەولەت نەهاتیە راگەهاندن، ئایا وەکی هندەک هزر دکەن بو دەولەت بوونێ پێدڤیە شەرەکێ جیهانی روی بدەتن، تاکو دەلیڤە هەبیت کورد دەولەتێ رابگەهینت. لەورا پێدڤیە ئەم کورد خوە بگرین شەرێ سیێ جیهانی روی بدەتن، دا کو کاودان بو مە و بو بەرژوەندا مە خوەش بن. عەرەبان ب ناڤێ ئیسلامی بیست ئێک دەولەت بو خوە پێک ئینان، تورکان ب ناڤێ تەلەسمێ خوەیێ تورانیەتێ خوە کرن دەولەت، و فورسا ژی ب ناڤێ ئمپراتوریەیا شیعەتیێ خوە کرنە دەولەت شەرێ ئێکێ و دووێ ژی چەند وەلات ل گوشە و کنارین جیهانی هاتنە راگەهاندن. ئایا چەنکو ئەم خودانێن صلاح الدین ایوبی نە کو شیای قودسی ژ دەستێ خاچ پەرەستا رزگار بکەتن، یان ژی باردوخ و کاودانێن دەڤەرێ ژ لایێ سیاسی نە هاریکارن.
ئەڤە هەمی هێجەتن کو تینە گرتن و گوتن، سەدەما نە دەولەت بونا کوردستانێ، کورد خوە ب خوەنە! کاودانێن ناڤخویی یا کوردان تایبەت ل سەر ئاستێ هەرپارچەکێ هاریکار نینن و ب شێوەکێ گشتی لسەر ئاستێ کوردستانا مەزن ئێکجار هاریکار نینن. چێدبیت گەلەک هزر بکەن بابەتێ من گەلەک رەشبینی تێدایە. دڤێت ئەم گەشبین بین لێ بابەتێن بڤی رەنگی پێدڤیە ئەم ب شێوەکێ ریالیزمی و راستی هزر د دورهێلا وی دا بکەین و خوە دویر بێخین ژ هزرێن دویر ژ راستیێ، چونکە ئەڤا باس لێتێە کرن دورست نینە ئەم خوە پێ خاپینین.
نەبوونا ئێکگرتنێ خالا ئێکێ یە وەک ئاستەنگ د رێکا دورست بوونا دەولەتا کوردی کو چێکرنا بێ تفاقیێ پلانێن دوژمنێن ڤی مللەتی بوینە و ب خالەکا چارەنڤێس ساز تێتە ل قەلەم دان، و ب کریار ئەڤی میللەتی ئەڤ چەندە ل پێڤەژویا مێژوویێ دا دیار کرییە کو لگەل ئێکگرتنێ نینن واتە دژی هەبوونا ئێک هەلویستن بەرامبەری کێشەکا چارەنڤێس ساز.
لەورا وەلاتێن خودان پارچێن کوردستانێ خالا لاواز دزانن و گەلەک هزرێ د پەیدا بوونا ئێک هەلویستێ دا ناکەن، چونکە هزر کرنا مە ژ کیسێ وانا و ئەم مێشکێ خوە نادینە شولی بو داهاتێ خوە هەر کەسەکێ داهولەک لێ بدەتن ئەم داوەتێ دکەین.
هەر عەرەب کوردان ب موسلمان نزانن، لێ دانا پێناسا موسلمانیێ دورهێلەکە کو بو بەرژوەندێن بلندێن وانا باش.بەلێ ئەم هەر دەم دبێژین : براتیا کورد و عەرەبان! هیچ برایەتی مە ل گەل عەرەبا و کەسی نینە. لێ ئەم دترسین ئەگەر مە وە گوت ئیسلام دێ ژ دەستێ مە چت، سەرەرایی وێ چەندێ ئەم دزانین کو هەمی زولم و ستەما ل درێژیا مێژوویێ ل مە هاتی کرن کەسەکی ل مە نەکرە ژ موسلمانا پێڤە، ئەوێن دبێژن دەولەتێن عەرەبی و ئیسلامی، جامێرا شولێ خوە دزانن چونکە ئیسلام روناهیێە، و بو هەمی عەرەبا ژی بویە روناهی چونکە هەمی ل بیابانێن گزیرتا عەرەبی دژیان و هەر چ حساب لسەر نەبوو، بەلێ ئەڤرو ئەو یێ حوکمی ل کوردا دکەن، کو وەکی ئەم گەلەک جاران دبیژین کورد بەری هەمیا دەولەت هەبوویە بەلێ نوکە هاتیێە داگیر کرن، کەس هزر ناکەت و ب مێرانی بێژت کو ئەم دیڤەلانکێن عەرەب و تورک و فورسا بوینە، بو پاراستنا ئیسلامێ کو مە ئەو ب ئەمیر و رێبەرێن خوە دزانین حەتا جارەکێ ژی کوردان ماف نەدایە خوە کو ب ئامادەبوونا عەرەبەکێ نڤێژەکێ بەری خەلکێ بکەتن و هەردەم مە گوتبیت مافێ من گوتنە ستایشا خوەدێ و پێغەمبەرێ وی بکەن و بو وە نینە کو ژ بن شیرێ ئیسلامی دەرکەڤن. ئەڤە سەدەما وێ چەندێ یە کو ئەم باش ل ئیسلامێ نەگەهشتینە و نوکە ژی ئەم چ ژێ نزانین، چونکە دبێژن ئەوێ بو بکێر خوە نەهێت بکێر خەلکێ ناهێت.
قەبوول نەکرنا ئێک و دوو گەلەک یا خرابە، کەسەک ژ مە نینە سنگەکێ بەرفرەه هەبیت دەما کەسەک تشتەکی د بەرژوەندا گشتی دا بیژت قەبوول بکەین، بەرژوەندا کەسوکی یا مە هەردەم بەری بەرژوەندا گشتی هاتیە و تێت. ب ڤی رەنگێ هزر کردنێ ئایا وە هزر د وێ چەندێ دا کریێە کو ئەگەر هەر چار پارچێن کوردستانی بونە ئێک دێ چەوا هێتە برێڤە بردنێ، ئایا راگەهاندنا دەولەتا کوردی کو ببیتە ئەگەرێ کوشت و کوشتارێ دناڤ واندا ژ سەدەما ڤی هزرکرنا وان یا خراب ب دیتنا تە یا باشە.
پێش وەخت مێدیاێن کوردستانی باس ل بلند کرنا ئالایێ کوردستانێ دکر ل گەل ئالایێ ئەمریکا ل گەلەک جهان، و بو مە روداوەکا مێژووی بوو، ئەڤێ کارتێکرنا خوە هەیە یان زەمینێ خوەش دکەتن کو کورد ببنە دەولەت؟ بەرسڤ نە چونکە هاتنا ئەمریکا بو عێراقێ نە ژ بو چێکرنا دەولەتا کوردی بویە، ئەگەر ئێک هزر بکەت کو ئەمریکا فیدرالیەت بو هەرێما کوردستانێ پەسەند کر، بلا خەلەت خوە تێنەگەهینت، جەنابی بارزانی بوویە کو هەمی لایەن ئێخستئنە بن فشارێ بو چێکرنا فیدرالیا هەی ل هەرێمێ، واتە هەر د پروگرامێ کوچکا سپێ دا نەبوویە کو مافەکێ بو کوردان دابین بکەتن، لی ئەگەر تشتەک ل بەرژوەندا کوردان دا هاتبیت کرن، ئەو بەرژوەندا گەل یا ئەمریکا دا ئێک بوون هندەک جاران. ئەگەر هندەک هزر بکەن ب بلند کرنا ئالایێ کوردستانێ یە، کو ئەم ببین دەولەت ل کوردستانا باکور ل کومڤەبوونێن وان یێن ملیونی ئێک ئالایێ کوردستانێ ناهێتە هەلگرتن تاکو بهێتە بلند کرن.
هەلویستێ پارتێن سیاسی بخوینە یێن کو ل گورەپانا کوردستانێ دا خەباتێ دکەن، پروگرامێن وان تشتەکە، کریارێن وان تشتەکی دیتر. نزانم ئەڤە دێ چەوا دەولەتێ برێڤە بن. پرانی خەباتێ دکەن بو بەرژوەندا پارتا خوە، و بەژوەندا کوردان ل بن پێ دکەن. هندەک چ هێز هەیە و خەباتێ دکەتن بو دەلەتا کوردی یێن دی هێزەکا هەڤدژ هەیە بو ژناڤبرنا ڤێ هزرێ واتە سیخور و نوکەرێن دوژمنانە.
مێدیا و چاپەمەنیا ببینە و بخوینن هیچ گەش بینیەک مروڤی نابیت کو ئەڤ جورە هزرو بیر چەوا حەزا دەولەت بوونێ هەیە، چ هەلویستێن سیاسی بن چ روشەنبیری، نەک تەنێ ژێک دویرن ب هێچ شێوەکێ ئێک ناگرن. واتە هەمی ئەون ین تێکدانێ و خرابکرنێ کەس نابیژت فلانی ئەڤ کارە ێ کری چەوتیەک یا ئەنجامدای بلا فلان شێواز گرتبا بەر، واتا هەمی رەخنێن وێران کەرن. ڤێجا وەرە کوردستان تو خودانێ ڤان هزران بێ دێ چەوا بێ دەولەت.
ئاریشا مە ئاریشەکا هزری یە پتر ژ هەمی ئاریشا، ئەڤ میللەتە دڤێت هزر بکن و ئەو خوە بخوە هزرا چێکەن نەک ب هزرا قحطانی، تورانی و پارسی هزر بکەن، و خوە ژناڤ ببن.
