نەخوش کەفتنا مام جلال،ی یەکیتی وەک پارتەکا خودان پێگەهەکێ جەماوەری کێشایە د ناڤ دەنگ و باسێن روژانە، ئەڤ چەندە ژی بو کەساتیا تەلەبانی دزڤریتەڤە کو خودان سەنگەکێ سیاسی و بەرچاڤە ل گورەپانا سیاسی دا چ وێ دەمێ کادر دناڤ رێزێن پارتی دیموکراتی کوردستان یان ژی وەک سکرتێرێ گشتیێ یەکیتیێ کو شیایە یەکیتی نشتیمانی ژ قوناغێن سەخت و دژوار ئاراستە کنارێن ئارام بکەتن. بێ گومان ئامادە نەبوونا مام جلالی ئاکامێن نەرینی هەنە کو کارتێکرنێ لسەر رەهەندێن ستراتیژی ێن کوردی دکەن نە خاسمە دڤێ قوناغا هەستیار دا.
پارتی دیموکراتی کوردستان و کەساتیا بارزانی کو ب دیدەکا نەتەوەیی بەرێ خوە دەتە ئەڤێ چەندێ لەورا دەستێ برایەتێ بو لایێ وانا درێژ کرییە و پشتەڤانیا خوە بو وانا دوپات کرییە.
ب دیتنا من پارتی وەک هێزەکا سیاسی یا ب هێز و خودان جەماوەر کو پتر ژ نیڤ چەرخی یە خەباتەکا بێ راوستیان پێناڤ بدی هێنانا ئارمانجێن نەتەوەیی دکەتن و ئەنجامێن وێ هەمی پێکڤە بوینە سەروەری کو پێگەهێ وێ روژب روژ ب هێز و بەرفرەهتر لێ بهێتن، و پارتەکا ب ڤی رەنگی ب پێویست نابینت کو هەژمونیا خوە بێخیتە سەر یەکیتییا نشتیمانییا کوردستانێ ل دویر کەفتنا مام جەلالی، هەر وەک هندەک وێ هزرێ دکەن.
ژلایەکێ دیڤە پارتی رێکەفتنەکا ستراتژی ل گەل یەکیتی هەیە، و ئەڤێ رێکەفتنێ ب دەستکەفتەکا مێژویی بو گەلێ کوردستانێ دزانت، و بەردەوام داکوکێ لێ دکەن، زێدەباری ڤێ چەندێ جەنابێ مام جلال بوشاییەکا ئێکجار مەزن ل گورەپانا سیاسیا عێراقێ ب گشتی و کوردستانێ ب تایبەتی پەیدا دکەتن و ئەڤ چەندە ژی بو پارتی قوناغەکا هەستیارە چونکە ل گەل یەکیتی هەڤپەیمانن ل ناڤ هەرێمێ و بەغدا. و مانا یەکیتی وەک هێزەکا سیاسییا ئێکگرتی پشتەڤانیەکا ب هێزە بو پارتی بو هەلویست وەرگرتن بەرامبەر ئاستەنگێن دکەڤنە رێکا جێ بە جێ کرنا ئارمانجێن گەلێ کوردستانێ بو نموونە وەرگرتنا هەلویستەکێ ئێکگرتی بەرامبەر ئینان و برنا یەکێن لەشکرەی ژلایێ حکومەتا ناوەندی بو سەر دەڤەرێن ڤەقەتیای ژ هەرێمێ.
پارتی و بارزانێ رێکخستنا ناڤمالیا کوردی و کومڤەکرن هەمی لایەنان ل ژێر ئالا کوردستانێ ب ئەرکێ خوەیێ نشتیمانی دزانن و جەنابێ بارزانی د هەمی ووتار و رینشتنێن خوەدا داکوکیێ ل ئێک هەلویستی و ئێک رێزیا گەلێ کورد دکەن و بو جێ بەجێ کرنا ڤێ ئارمانجێ کێمتر خەمی نەکریە، و دەرڤەیی ڤێ ئارمانجێ هەژمونیا خوە ب سەر چ لایەنەکێ دا نا سەپینت.
