من پێدڤی زانی کو دڤی مینبەری چەندەکێ دل ب دلێ ھەڤدو بدەین و دلێ خوە ئارام بکەین، براستی د درێژییا تەمەنێ خوە دا مە موسیبەتەک بڤی رەنگی نەدیتە کو ئەز ب ڤی ئاوای شەپرزە و بریندار ببەم، ئەڤ ھەست پێکرنا من و ئێک ئێک ژ ھەوە، پێدڤییە ل دەف ھەمی کوردەکێ ب شەرەف و ناموس و کرامەت ھەبیت.
جھێ داخێ یە کو ئەڤرو چەندین کەسێن خائین و خوفروش میللەتی مە ب بھایەکێ چ نە فروشتی، ئەڤ ھەلویستە ژ ڤێ باشتر ژ وانا نەدھاتە چاڤەرێ کرن و د پێڤەژویا خەباتا ئازادیخوازا کوردی ئەڤ چەندە گەلەک جاران روی دایە و یا ئەڤ جارە ژی لسەر ھەمان رێکێ چەند جارکی دووبارە بوویڤە، لێ مروڤ توڤێ چ بچینت دی ھەمان دەرامەدی بدەستڤە ئینت نەکێم و نە زێدەتر!
ئەم گەنجێن کورد پێدڤیە فەرمودا پێشەوا بارزانیێ نەمر ژ بیرنەکەین دەما دفەرموی" ژ شکەستنا نا ئومێد نەبن و ژ سەرکەفتنا غرور نەبن"، بو خوە بکەینە سەر مەشق و خوە ل شکەستنا ئەڤرو بکەینە خودان و خوە بەرپرس بزانین ھەمبەر مێژوویێ و مللەتێ خوە و نەکەڤینە سەر پشت و مللێ ھەڤدو و ب ئاخفتن و گوتنێن نەجوان ھەڤدو ل ھەمبەر چاڤێ دوژمنان ناشرین بکەین.
و ئومێدێ ژ دلێ خوە پاڤێژین و خوە رادەستی دورھێلا ھەی بکەین و خوینا شەھیدێن خوە و روندکێن دەیکێن خوە ب ھەروەیی ببەین.
ئەڤرو دوماھیکا دونیایێ نینە و نابیت کو ئەم تێنە شکەستن، ممکنە ھەر د تەمەنێ خوەدا چەندین جاران ئەم تام بکەینە شکەستنێ وپێدڤیە زور ب سروشتی بھێتە وەرگرتن، چونکە چ کەسەک ژ مە ئەو نەبوویە کو مە بەرژوەندییا مللەتێ خوە و وەلاتێ خوە دانابیتە پێش بەرژوەندا خوە یا تاکە کەسی، و ھەر پێنگاڤەک مە بو ئەڤی میللەتی ھاڤیتبیت بێ شک مە د فیلتەرێ بەرژوەندییا خوە یا تایبەت را دەرباز کری داکو ئاراستە وێ زور یا لاواز و بێ ئەنجام و بێ مفا بیت.
بو چی ئەم راست نابین دگەل خوەدا، میللەتێ مە میللەتەکێ زولم لێ کرییە کو د درێژییا مێژوویێ ژلایێ دەسەلات دارێن عێراقێ زولم دیتی و ئەم ھەمی بینەرێن ئەڤێ چەندێ بووینە لێ پشتی مە کوردا حوکم بدەست خوە ڤە گرتی ھەر ئەو زولم مە ل میللەتێ خوە کر و خرابتر، ئەوا عەرەبا دەر حەقێ مللەتێ مە دا دکر بو وانا ب رەوا ل قەلەم ددەم لێ ئەوا مە ب سەرێ ھاوەلاتیێن خوە ئینای تشتەکێ نارەوا بو و شەرمزار دکەم.
مللەتێ مە ھەژی باشترین ژیانە و پێدڤیە رێز لێ بھێتە کرن لێ دەرئەنجامێ سیاسەتا دوو ئیدارەیی و ململانا نە شریف یا پارتێن سیاسی ژ ھەمی پێدڤیێن بنەرەتی یێن ژیانێ بێ بەھر بوون، و ھاتینە دابەشکرن لسەر دووئاستێن ژیانێ(دەولەمەندا و ھەژار) و ھەست کرنا وانا بو ئنتیمایا وەلاتی مە دناخێ وان دا یا سوتی، لێ چونکە حەژێکەرێ ئاخا خوە بوینە پێنگاڤ پێنگاڤ ب بەروکا ڤالا قوناغ قوناغ مل ب ملێ مە پشتەڤانیا خوە بو پێشەواتیا مە دیارکرییە، چونکە حەژێ کەرێن ئاخا خوە بوینە، و دخوازن سەربەست بژین.
پێدڤییە مروڤ وانە ژ مێژویێ وەربگرت! ئەگەر نە پێدڤیە تو ھەمان وانێ چەندین جارا وەربگرێ، ئەڤە ھاوکێشەک نەگورە، و مێژوو ماموستایەک سەر سەختە و رەحمێ ب کەسەکێ نابیت تاکو ب میللەتێ مە ببیت، بلا ئەم باش بزانین.
ئەو سەروەت و سامانێن مە کوم ڤە کرین ب رێکێن نە دورست، ئەگەر ھەمی د پێناڤ ئاسودەیی و بەرژوەندا میللەتی خوە دا مە مەزاختبا بێ شک ئەڤرو ب چاڤەکێ دی خەلکێ مە یێ شەپرزە دا تەماشەی مە کەن، بلا خەلک د رویێ مەدا بێژن سەرێ مە ساخ بیت لێ د واقعی دا نەفرەتا ل مە دکەن بلا ئەم باش بزانین.
ئەگەر دەست ب سەر میللەتێ من و وەلاتێ من و کەرامەت و شەرەفا من دا ھاتە گرتن، ئەڤجا سەروەت و سامان ب چ بھایەکێ ناچیت.
دیسان دبێژم سەرێ مە ساخ بیت، ئەگەر مە ئیرادە ھەبیت دەێ شێن ئەڤێ قوناغێ ژی دەرباز بکەین.
ھەر بەرز و بالا بیت ئالا کوردستانێ، مرن و روو رەشی باھرا خوە فروش و خائنا.
